Charles de Secondat, Baron de Montesquieu

Dr Charles-Louis de Secondat, Baron de La Brède et de Montesquieu (dauft am 18. Januar 1689 uf em Schloss La Brède bi Bordeaux; † 10. Februar 1755 z Bariis), bekannt under em Naame Montesquieu, isch e franzöösische Schriftsteller, Filosoof und Staatstheoretiker vo dr Ufkläärig gsi. Er gältet as e Vorlöifer vo dr Soziologii, as e bedütende politische Filosoof und as Mitbegründer vo dr modärne Gschichtswüsseschaft.

Für sini Zitgenosse isch er e Vordänker vo dr Ufkläärig und en erfolgriiche belletristische Autor gsi, aber in dr Gäistesgschicht isch er vor allem as e gschichtsfilosofische und staatstheoretische Dänker vo Bedütig, wo au hüte uf aktuelli Debatte en Iifluss het.

Si Brinzip vo dr politische Gwaltedäilig, wo hüte in Demokratie wenigstens as Grundsatz gang und gääb isch, isch zum erste Mol 1755 in dr Verfassig vo dr churzlääbige Republik Korsika, wo scho 1769 undergange isch, iigfüert worde. Mee Erfolg het s as Grundstäi vo dr Verfassig vo de Veräinigte Staate vo Amerika gha, wo sit em Joor 1787 in Chraft isch. In dr französische Verfassig vo 1791 isch si aber nid umgsetzt worde.